ԵՄ աջակցությամբ ՀՀ Լոռու մարզում բացվեց ևս 4 նոր բիզնես
Լոռու մարզի Վանաձոր, Ստեփանավան և Ալավերդի քաղաքներում ԵՄ աջակցությամբ բացվեց չորս նոր բիզնես: Բոլոր ձեռնարկությունները գործունեությունը սկսել են ԵՄ և ՀՀ կառավարության համաֆինանսավորմամբ Հայաստանի ՓՄՁ ԶԱԿ-ի և նրա գործընկերների ...
ԵՄ աջակցությամբ ՀՀ Լոռու մարզում բացվեց ևս 4 նոր բիզնես
Լոռու մարզի Վանաձոր, Ստեփանավան և Ալավերդի քաղաքներում ԵՄ աջակցությամբ բացվեց չորս նոր բիզնես: Բոլոր ձեռնարկությունները գործունեությունը սկսել են ԵՄ և ՀՀ կառավարության համաֆինանսավորմամբ Հայաստանի ՓՄՁ ԶԱԿ-ի և նրա գործընկերների կողմից իրականացվող «Տարածաշրջանային ՓՄՁ-ների մրցունակության խթանումը» ծրագրի շրջանակում: Նոր ձեռնարկությունների բացմանը ներկա էին Հայաստանի ՓՄՁ ԶԱԿ-ի գործադիր տնօրեն Արշակ Գրիգորյանը, Ալավերդի համայնքի ղեկավար Սասուն Խեչումյանը, Ստեփանավան համայնքի ղեկավար Միքայել Ղարաքեշիշյանը, ՓՄՁ ԶԱԿ-ի Լոռու մարզային մասնաճյուղի, գործընկեր կազմակերպությունների ներկայացուցիչներ: 
 
Ապիտուրիզմը և ապիթերապիան նորույթ են Հայաստանի համար: Մեղուների միջոցով բուժումներ իրականացնելու նպատակով է Վիգեն Մնացականյանն Ալավերդի քաղաքում հիմնեց իր բիզնեսը՝ ԱրմԲի-ն: Վիգենը ոգևորված էր մեղվապահական բիզնեսի գաղափարով և հատկապես մտադրվել էր իր գիտելիքները և հմտությունները կիրառելով՝ զբաղվել ապիտուրիզմով։ «Ես ցանկանում էր կազմակերպել մեղվապահական տուրեր, ուր զբոսաշրջիկները կկարողանային ուսումնասիրել  մեղվապահությունը, դիտել մեղրաքամը և մեղվապահությանն առնչվող այլ գործողությունները, իսկ հատուկ պատրաստված ապիտնակներում մարդիկ կարող են շնչել  փեթակի բուժիչ ջերմ օդը, համտեսել լեռնային խոտաբույսերի թեյերը և հանգստանալ՝ վայելելով մեղուների քաղցր ու հանգստացնող բուրմունքը՝ լսելով նրանց բզզոցը»,- նշեց երիտասարդ սկսնակ գործարարը։
 
ԵՄ աջակցությամբ անցկացված դասընթացին մասնակցելուց, ֆինանսական և վարկային միջոցներն ստանալուց հետո Վիգենն անցավ գործի: Նա բարեկարգեց տարածքը, կառուցեց երկու ապի-տնակներ և այժմ պատրաստ է ընդունել հաճախորդներին:  
 
 
Վանաձորում բացված «Գանձակ» արագ սննդի և հացաթխման կետի  սեփականատեր Ռուզաննա Հայրապետյանը նոր բիզնեսը հիմնել է իր ընտանիքին պատկանող չգործող նախկին կահույքի սրահի տեղում: «ԵՄ և Հայաստանի ՓՄՁ ԶԱԿ-ի աջակցությամբ ստացած վարկային և դրամաշնորհային միջոցներով ձեռք բերեցինք անհրաժեշտ կահույքն ու սարքավորումները: Իսկ տարբերանշանի ձևավորման և վահանակի պատրաստման հարցում օգնեց ծրագրի գործընկեր «Ռազմավարական զարգացման գործակալություն» ՀԿ»-ն»,- նշեց կին ձեռներեցը: 
 
Հայաստանի ՓՄՁ ԶԱԿ-ի գործադիր տնօրեն Արշակ Գրիգորյանը շեշտեց, որ Ռուզաննա Հայրապետյանը հաջողակ կին ձեռներեցի վառ օրինակ է: «Ձեր հաջողությունը բոլորիս թիմային աշխատանքի արդյունքն է»,- նշեց Գրիգորյանը: 
 
Արման Առաքելյանը Լոռու մարզի Ստեփանավան քաղաքում հիմնել է «Լոռե» ՍՊԸ-ն, որը մատուցելու է հյուրընկալության ծառայություններ՝ նախատեսված և ակտիվ, և պասիվ հանգստի սիրահարների համար։ Լոռեն ակտիվ տուրիզմի սիրահարներին առաջարկելու է ոչ միայն արգելքներով պատ, այլև զիփլայն և այլ արկածային և էսքտրեմալ զբոսաշրջային ծառայություններ: «Լոռե» հանգստի գոտին տրամադրելու է նաև գիշերակացի ծառայություններ, հանգստյան առանձնատներ, կազմակերպելու արշավներ,  ճամբարներ։
 
«ԵՄ աջակցությամբ իրականացված դասըթացների շնորհիվ, կարելի է ասել, որ մեր աչքերը բացվեցին, ու հիմա այնպիսի կարևոր հանգամանքներ ենք տեսնում, որ առաջ չէինք էլ նկատում կամ կարևորում: Ֆինասական աջակցությունը հնարավորություն տվեց պատշաճ տեսքի բերել տարածքները և ընդլայնել մեր ծառայությունները։ Կարծում ենք մոտ ապագայում կընդլայնվենք և կստեղծենք նոր աշխատատեղեր», նշեց Առաքելյանը։ 
 
Իսկ նույն Ստեփանավանում բացված ևս մեկ հյուրատան սեփականատերն է Համլետ Թումասյանը: Նա ԵՄ աջակցությամբ կազմակերպված գործարար դասընթացին մասնակցելուց հետո ստացած վարկային և դրամաշնորհային միջոցներով ավարտին հասցրեց շինարարական և բարեկարգման աշխատանքները և ձեռք բերեց անհրաժեշտ կահավորանքը, նաև տեղադրեց փոքրիկ արևային կայան: Համլետն իր ընտանեկան հյուրատանն առաջարկելու է նաև էքսկուրսիաներ, հեծանվային  արշավներ, ձիավարություն և այլն։
 

«Ստեփանավանը հայտնի է որպես հանգստյան վայր իր առանձնահատուկ բնակլիմայական պայմաններով։ Եվրամիության աջակցության շնորհիվ հնարավոր դարձավ մեր շինությունը հարմարեցնել որպես հյուրատուն, կահավորել, և ինչը ամենակարևորն է, կառուցել ֆոտովոլտանիկ կայան և խնայել էներգիան։ Մենք ուզում ենք մեզ մատուցել որպես «կանաչ» հյուրատուն»,- շեշտեց Թումասյանը: 
 
Գործարարների հետ հանդիպման ընթացքում Հայաստանի ՓՄՁ ԶԱԿ-ի գործադիր տնօրենը նշեց, որ նրանց գործունեությունն ուղղված է ոչ միայն իրեն ընտանիքների, այլև համայնքի, մարզի և երկրի ընդհանուր բարեկեցությանը: «Հենց ձեր քրտնաջան աշխատանքի շնորհիվ է, որ ստեղծվում են նոր աշխատատեղեր, վճարվում են ավելի շատ հարկեր, ինչի շնորհիվ էլ ի վերջո հնարավոր է դառնում պետական աջակցության շնորհիվ ստեղծել նոր ձեռնարկություններ»,- ընդգծեց Արշակ Գրիգորյանը: 
 
Նշված չորս նորաբաց ՓՄՁ-ներն արդեն ստեղծել են ինը նոր աշխատատեղ և առկա է ավելացման միտում։ 
 
 

Գործարարների շուկայավարման կարողությունների զարգացման նպատակով, ծրագրի շրջանակում «Ռազմավարական զարգացման գործակալություն» ՀԿ-ն տրամադրել է  մասնագիտացված խորհրդատվություն՝ շուկայում ծառայությունների պատշաճ ներկայացման, ճանաչվածության բարձրացման և այլ ուղղություններով: 
 
2016 թ. դեկտեմբերին մեկնարկել է «Տարածաշրջանային ՓՄՁ-ների մրցունակության խթանումը» ծրագիրը: Այն իրականացվում է Եվրոպական Միության և ՀՀ տարածքային կառավարման և զարգացման նախարարության համաֆինանսավորմամբ: Ծրագիրն ուղղված է ՓՄՁ-ների մրցունակության աճին և կայուն աշխատատեղերի ստեղծմանը ՀՀ Լոռու, Արմավիրի և Սյունիքի մարզերում։ Ծրագիրն իրականացվում է Հայաստանի ՓՄՁ ԶԱԿ-ի կողմից` «Ռազմավարական զարգացման գործակալություն» ՀԿ-ի, «Արմավիրի զարգացման կենտրոն» ՀԿ-ի, «Սպիտակ-ֆերմեր» ՀԿ-ի, «Սյուն» ՀԿ-ի հետ գործընկերությամբ: